مقابلة صحفية مع ذاتى : الحلقة الثانية  

Posted by Amr Abdel Azim in

س / بقالك مدة مش بتكتب مقالات ولا بتألف حاجات جديدة يا ترى أيه السر ؟

شوف انا بعتبر الكتابة السوسيولوجية والأدبية كذلك عمل أبداعى بالأساس وده بيتطلب بجوار الفكرة الأبداعية والموهوبة الأصيلة فى ذاتها ، محاولة صقل تلك المهارة بالتدريب المستمر عشان نقدر نخرج بعمل أبداعى أصيل وقادر على البقاء والتأثير فى نفوس القراءة ده فى المقام الأول ، وبالتالى عشان أنا أقدر أحقق المستوى المطلوب لازم أستازيد بمعارفى أكتر وأقرا وأتابع الأحداث بوصفى محلل ومنظر ومتخصص سوسيولوجى وده مهارة بتحتاج وقت كبير فى " تقريب وجهات النظر و عقد مقاربات فكرية تحليلة ومحاولة إيجاد مقابلات فكرية للمنظرين السوسيولوجين " وبالتالى أعطى للمعانى والمفاهيم قيمته الغير حاضرة عند أذهان العامة

س / بخصوص النزعة العلمية اللى بتتبعها فى مفالاتك بتخلى ناس كتتير تعزف عن محاولة فهمها ده حتى من غير المتخصصين أنفسهم شايف أيه ؟

فكرة إجراء مقالة صحفية مع ذاتى فى المقام الأول هى نوع من تغيير أسلوب التناول داخل المدونة هنا ، لكن المهم بتقال عنى أن الأسلوب الأدبى اللى كان متبع فى تناول وعرض المقالات أخل بصورة مجحفة النزعة العلمية لتلك المقالات ، انا بحاول أقرب العلم السوسيولوجى ، تعرف الصعوبة الحقيقة والمهارة الذكية هى فى التفسير والشرح والتلخيثص دون الأخلال بروح العلم السوسيولوجى وعشان كده فى أسلوب العرض والتناول أنا بحاول أبعد عن التنظير الأجتماعى على الرغم من أنه مطلوب فعلا ، وبالتالى أنا بتبنى فى تلك المقابلات تغير لغة الخطاب بمعنى أن أعطى ليه منحى سياسي يضاف عليه اللغة العامية ، أنا بعتير ان جمال وبلاغة اللغة رسالة وعنوان لشخص متحدثها صحيح فى إنحطاط لغوى وثقافة تخلف فى المجتمع لكن ده مش يمانع بكل تجديد أنى أخذ على عاتقى " تجديد أسلوب الخطاب ده عشان يكون مواكب سرعة إيقاع الدلالات اللغوية الجديدة ، من منطلق سوسيولوجى مش ينفع يعيش السوسيولوجين فى جذور منعزلة عن أعضاء المجتمع أنا صحيح بعمل على تحقيق الأمر ويمكن فكرة الواجب السوسيولوجى اللى بقوم بيه مع جيرانى وأصدقائى بيكسب للعلم والمهنة ولشخصى " القيمه الغائبة عن أنظار الناس " ، ممكن أكون فعلاّ مريض بعشق اللغة العربية أنا لى ذكريات جميلة معاها فى الاعدادية والثانوية العامة وأيام الطفولة ، ده غير أنها لغة القرأن ، وعشان كده هقولك أمتلاك ناصية اللغة أمر مش سهل زى ما كل الناس متخيلة أنا بتابع الادب المترجم على قد ما أقدر والصحافة وكنت بقرأ بنهم جارف ، اللغة دلوقتى بقت من سمات المبدعين فى أشتقاق تعبيرات لغوية جديدة واللعب باللغة ده غير أنى بحب اللغة لأنى بطوعها فى مرحلة معينة مهارة سياسية وعملية جدا .

س / وبعدين مش أتحلت المشكلة كده ؟

أنا بزود باللغة وأخفى شخصيتى ورائها لأنها زى ما قولت عنوانى أمام الناس وهى جسر التواصل بينى وبنهم صحيح هى عامل حاجز وفيه ناس مش بتفهم وعلى قدر " عاملوا الناس على قدر عقولهم " أرى أن القصد منها الفهم بالأساس وأمتلك المهارة فى توصيل الفهم ضرورة ولازمة أساسية ، معلش انا ممكن أكون بقيت عنيف شوية وبقيت أتجاهات قوية فى بعض الامور الخاصة واللى العلم السوسيولوجى وبالاخص الجانب القيمى منه وأهداف اللى ينبغى السعى لها وانى مطلوب منى أرفع تزييف وعى الجماهير والكلام الجميل ده ، عشان كده بقول أنت مش فاهمنى " ده مش مشكلتى أنا مشكلتك أنت " روح أتعلم من أول وجديد ، انا مستغرب جدا من أمر مهم أن اللغة اللى بتكلم بيها ده لغة صحفية بالأساس ده غير أنى على غير عادتى مش بقيت " أتكلف وأتقعر فى اللغة " زى الأول الأمور بقت أبسط بكتتير ، المشكلة فى رأى أن لو كان أنصاف العقول أو الأميين مش فاهمين ده تبقى مشكلتى لكن صفوة العقول من الجامعيين مش فاهمين ، يبقى ده " تعبير عن خلال المنظزمة التعليمية والفقر المهارى للجيل الصاعد !! ".

س / وردت كلمة سياسية كتتير فى مقالاتك وأحاديثك لدرجة أختلف البعض عليها إيهما تقصد ؟

أن بتعبر السياسية هى فن ومهارة أساسية بوصفها تعبير " عن الممكن " أنا ملاحظ أن الناس بيلتبس عليهم الامر من حيث المفهوم أنا بتعبرها " فن أدارة الحياة " بالاساس أنا مش بقصد صراعات حزبية وحزب وطنى انا متابع جيد وإلى حد ما للأحداث لكنى ملتزم بميثاق العلم السوسيولوجى بالتخلى عن أى أنتماء حزبى مؤسسى أنا لا أفضل أكونة تباع لأيدولوجية معينة ، ده غير أن شايف فى " أزمة غير جديدة فى علم الاجتماع " وهى البعد السياسى ، معظم الأبحاث اللى بنعملها مجرد هرطقة صحيح كلام مش فاضى وجميل والناس ممكن تصقفلك والاعلام ممكن بتابع النتائج ورغم كده مجرد كلام خالى من " أستراتيجية وخطة سياسية " وبالتالى تبقى النتائج التى توصل إليها البحث هذا أو ذاك ذات قيمة مادية ملموسة يشهدها الناس ، مثلا بحث طلع قال أن معدل نسبة العنوسة بين الفتيات رقم كذا ، ممكن السوسيولوجين يعملوا أيه ساعتها ، أقولك أنا بقى هقعد واعمل " جلسة عصف ذهنى " وأجرب الافكار الابداعية لحل تلك المشكلة ، وبما أن " العصف الذهنى بيأجل تقييم الأفكار قبيل محاولة تنقيحها بتفكير نقدى تحليلى " ممكن نعمل أيه : واحد ممكن نأسس مصنع لتأسس عش الزوجية بأقل قدر من تكاليف الخامات مثلا ..نفكر فى إيجاد إسكان رخيص ..نلغى فكرة مؤخر الصداق والشبكة مثلا .. نبيح تعدد الزوجات .. نقلل من قيمة المهر نرجعوه لربع جنيه هو قيمة مش فلوس يعنى .. نعمل مؤتمرات تلف المناطق كلها لتعريف الشباب على بعض .. نطور مهارات الخاطبة بتاعه زمان .. خاطبة إلكترونية يعنى ... نعمل حفلات زفاف جماعية وندعى فيها مطربين يغنوا ببلاش .. نشوف مساعدات أجتماعية للشباب المقبلين للزواج من أثريا عرب وجمعيات خيرية .. برنامج أعلامى لتغير ثقافة المفهوم من الآخر بالاخص البنات .. نبيح زواج المسيار .. نسقط مصاريف التعليم المتميز أو الحكومى عن أول 20 ألف عروسين ينجبوا الطفل الأول ليهم ... شهر عسل فى صورة سياحة داخلية ..يعنى الافكار كتيرة .

س / تانى برضوه الكلام اللى بتقوله ممكن يكون جميل أزاى هتحقق ده ؟

مهو أحنا زى ما بنعمل أبحاث أكيد لأزم نخلق المؤسسات اللى تحقق ده ، يضاف إلى أن ده أمر ممكن بالاتحاد وتقارب الرؤى والتعاون مع مؤسسات المجتمع المدنى مش الحكومة يا سيدى كله متاح ، شوف أنا مؤمن ومتفائل جدا وحاسس وفيه ناس عارفه كويس جدا أحنا بتوع أجتماع لو عايزين نعمل حاجة هنعملها بس مش عايزين نوجع دماغنا ونشغل بالنا لكنه ممكن تعالى مسطرد بعد خمس سنين وشوف عمرو هيعمل أيه ، صحيح فى إحباطات كتتيرة من حولى فى المنطقة اللى ساكن فيها ، مهو لازم نعمل حاجة ..بس مين هما الناس دول ، اللى مؤمنين بالعلم وبأهميته ودوره .

س / هتعمل أيه فى مسطرد يعنى ؟

مشروع تحديث وتنيمة ، الافكار كتيرة مسطرد عايزه صفوة سياسية .. على العموم خالى الكلام ده لما يجى وقته .

س / بتقول أن أنت فى أجازة وبتستعيد لياقتك الذهنية ! توضيح أكتر ؟

أن بعتبر ان فترة الجامعة كانت فترة نشاط وطاقة ذهنية كان معترف بيها دكاترة قسم أجتماع وعلى مستوى زملائى وأنا كمان حاسس كده ، انا بتبع أستراتيجيات لأستعادة لياقتى الذهنية ، عشان أجدد أفكارى وأطور من نفسى وده مطلوب وإلا الأناء سينضب بكل تأكيد وبما أنى مدفوع لأستعادة أشراقى وتحقيق الاهداف المعلن عنها ، لازم نرتاح شوية عشان أحافظ على النشاط الذهنى ده ، انا ببساط بحاول أرجع إلى عمرة الانسان ، من الآخر أدلع نفسى صحيح برضوه مش بقدر أخرج عن ذاتى أوى مش بقرأ كتتير .. بنحنى التفكير النظرى والتحليل السوسيولوجى جانبا ... بسمع أغانى ومطربين جدد بس برضوه المعانى السياسية والسوسيولوجية متحكمة فى ... أخرج لاصحابى كتتير .. أتمشى على النيل فى مسطرد .. أتفسح شوية .. الفكرة كلها محاولة التمرد على " قيود وأسر العادة والروتين مش أكتر " .. أغير مواعيد نومى .. أود أهلى .. أهتم بنظافتى الشخصية ونوعية المأكولات والمشروبات ..أروح بيتنا الجديد ..

1 انشر تعليقك على المقالة »

مقابلة صحفية مع ذاتى الحلقة الأولى  

Posted by Amr Abdel Azim


س1 / أيه رايك فى عرض أتصالات الجديد الدقيقة بـ 19 قرش ؟
ده شركة بتحترم عملائها ومش غريب على اتصالات تعمل كده ، ده فى راى صورة جميلة عن الرأسمالية الرشيدة ودور القطاع الخاص اتجاه المجتمع اللى بيتعايش من خلاله ، مش غريب على اتصالات مصر تعمل حاجة زى كده انا كنت متوقع الحتة من موضوع زمان ، انا متابع الشركة ده ومشترك فيها من زمان وبعيد عن المنافسة كفاية الدور الاجتماعى ،ليها فى توصيل المياه الصالحة للشرب للقرى المحرومة منها . أنا أمنية مجنونة كده أقف فى الشارع وقول بعزم صوتى أنا بحب أتصالات ، على فكرة انا بفكر أطور حاجة فى علم الاجتماع كده لتطوير الشركة الفكرة هتكون مجرد مساهمة أرجو أن تقبل للشركة اللى قبلت فخراّ أنها تكون ممثلتى على مستوى رأسمالى عالمى . انا بحب أتصالات وبس ، من الغريب تلاقى سوسيولوجى منتمى لشركة بالشكل ده وده ظاهره صحية فعلا !!

س2 / عمال تقول عايز تخش التاريخ هتعمل حاجة تكسر الدنيا ، واضح انها أتأخرت أووى ليه كده ؟
الفكرة كلها بدور أنى بشجع نفسى جدا عشان أعمل حاجة تخدم الناس وتسجل الواحد انه دخل التاريخ بيها ، أهو الواحد يحس انه ليه قيمة فى حياته ، انا مش عايز أكون زى الشباب اللى مش لاقيهم هدف فى الحياة بيسعوا إليه ، وده أسلوبى
من زمان من سنة أولى أبتدائى بحب جدا أكون تحت الأضواء مش بالكدب لا بالشخصية الجديرة بالاحترام !!!

س3 / عمال تأخد مواقف مش إيجابية من قسم علم الاجتماع وبالذات المقالة الأخيرة اللى كتبتها ؟ ليه كده ؟
صحيح أنا بقول انقسم علم الاجتماع ده بيتى اللى انا عيشت ودرست فيه وانا مش هنسى الفضل فى التربية العلمية والشخصية اللى أدهالى روح القسم ، انا فعلا كنت مبسوط معاهم طول الفترة ده وحققت اللى كان نفسى فيه ويمكن أكتر شويه لو كان أتوفرت لى الامكانيات ، أنا راضى عن نفسى جدا ، بس اللى قاهرنى واللى مخلينى أتعب نفسياّ مظاهر الناس فى الشارع ، الناس تعبت أووى ، الواحد بيشوف مناظر مؤسفة ، المفروض أننا معنا المفتاح السحرى والحل فى أيدينا وكلنا عارفينه ، انا شايف ان المفروض على اعمل حاجة أى حاجة ترفع عن الناس ده الظلم اللى هما فيه ، على الناحية التانية شايف بتوع اجتماع كل اللى هامهم ، أشتغل معين وهكسب من وراه كام حتى زملائنا للأسف بوا كده ، اللى بيجرى وراء مصالحه بس انا عارف السبب ده ليه ؟ بس يا جماعه أحنا لينا دور برضوه ، نعمل أى حاجة ، نرحم الناس ده ، احنا عاملين زى الدكتور اللى عارف دواء العيان بتاعه ومش عايز يدهوله بحجة هيدفع كام ؟ حتى لو مش معاه فلسو يسيبوه يموت !! .

س 4/ بس أنت كده مش قولت كل الحقيقة متهيلى كده ؟
تقصد عن كلمة أنه قسم مش فيه خير لأبنائه ؟ ده فعلا عن حقيقة بس ده مرتبط بلعبة مصالح داخل قسم الاجتماع أنا أرفع انى أشترك فيه ، انا أكتر حاجة مش بحبها لعبة الشلالية وده حقيقة فى قسم الاجتماع من زمان حتى لما كنا بندرس كان موجود نظام الشلالية ، وكان لكل مجموعه وللغريب والات مختلفة وأفكار مشوه عن الغير ، صحيح أختفت العدالة وتكافوء الفرص وبقيت المواضيع الخاصة بالطلابة بقت فيها ظاهرة الشخصنه أووى ، هقولك على حاجة شوف قسم اجتماع جامعة هارفرد بيعمل أيه مع الطلبة بتعوه وتعالى كلمنى

س 5/ بس الغريب أنك فى طول الدراسة مش كان ليك المواقف الجامدة ده أشمعنى خرجت دلوقتى ؟
بصراحة انا كانت عندى صور من عدم التفرقة والتمييز موجودة وكلنا معترف بيها ، سواء كان ظاهر أو غير ظاهر بالضرورة ، اللى عايش ألفت الانتباه ليه أن أنا مش هولى نفسى حكم لماذا أقمت علاقة بهذا وذلك ، الامور بتخضع لرؤية شخصية ولعبة مصالح قذرة ، بالنسبة لى خلاص من ساعة يوم حفلة التخرج ظهر بعض الزملاء أنهم مش يستحقوا دخول القسم ده أو يبقوا أصلا بتوع اجتماع من الأساس ، الامور زى ما قولتك شخصنه يحضر ، هعزم فلان عشان كذا وده مش هيتعزم مع ان المفروض الدعوة توجه للجميع ، مش يتم أستبعاد فلان وفلان عشان مصالح .. عيب بجد

س6/ طيب والماجستير هتعمل أيه فيه ؟
صحيح أنا لى مشروعى الخاص والافكار عندى كتتير انا بحلم بأطروحات جميلة فى علم الاجتماع الآلى زى مشروع المدينة الرقمية وأنى أعمل دراسة للتحديث والتنمية تكنولوجيا زى المشروعات اللى بتعملها أنتل وغيرها كتتير وبالاخص ان حجم المعلومات التكنولوجية اللى عندى بيأهل لكده وبالاخص انى سئمت من صورة رسائل الماجستير اللى بتتعمل أفكار مقلدة مش فيه أى أبداع أو أصالة العملية بقت معاى شهادة عالية وخلاص ، انا عايز أطور فى منهج علم الاجتماع وبالاخص المرحلة الاجرائية أسلوب جديد، راسلة فيها مواقف سياسية ونماذج لمشروعات بتحقق وتخدم الناس ، على فكرة الرسائل فى جامعة عين شمس عليها تراب كتتير أووى متهيلى لولا الباحثين اللى بيتصفحوها زمانها بقت طين خالص .

س7 / هتخش ماجستير ولا لا؟
أنا لسه مش ريست على قرار حقيقى فى الموضوع ده لانه مرتبط بحاجة مهمة وهى أولا أرتباطى بعمل حر فى المقام الاول لأنى مش هخل بالتزاماتى المادية أتجاه اهلى وهما لقيم حق على ، ده غير انى شاب لأزم أفكر فى مستقبلى العاطفى وأعف نفسى زى كل الشباب اللى بيسعوا لكده مضافاّ إليه تفرغى وأنى اجدد نشاطى ولياقتى الذهنية لأعلى معدلات الروح المعنوية ، ده غير أن نفسى أنسددت من قسم الاجتماع ده !!.

س8 / عمرو واضح أنك مصدوم من سبب أنت مش عايزه تقوله ؟
على الرغم من أى واحد ممكن يخمن الموضوع ده وتخمينه يطلع صحيح بنسبة 100 % ، انا الموضوع اللى بتتكلم عليه أو تقصده أنا أخدت موقف فصل فيه وأنتهى من زمان ، انا مش أملك حق مسألة حد وأنتهى الامر بالنسبة ، صحيح أنا مصدوم بسببه لكن مش ننكر مجهود الناس والدور اللى قاموا بيه معاى بالذات انى كنت صورة من الفتى الذهبى ، انا دلوقتى أحسن من الاول بكتتير بفضل العلم وأكيد بشكرهم على انهم خليهم أعيد الاعتبار لنفسى وأقبل روح التحفيز الجديدة

س9/ أنت مش بتحب الكوره صحيح بس كان ليك رأى مهم فى النادى الأهلى ؟
طبعا عندك حق ، انا مش بفضل الكورة لانها باب لتزيف الوعى ، شوف الناس فى المترو فى الاتوبيس قدام فرشة الجرايد ، الشباب بقت ثقافتهم كروية بالاساس ، وده شى خطير جدا تعال أسال أى وحد منهم عن الاحداث السياسية الأخيرة او القرارات الأدارية فى الدولة ، ده حتى مش عارفين عدد الاحزاب أو مين هو رئيس الحزب الوطنى أو الغد او التجمع المشهورين منهم ، نسبة توزيع الصجف الكورية متهيلى اكتر منها الرياضية ، على العموم بعيد عن تزيف الوعى والمخططات الغربية اللى بتتبع فى ألهاء الشعوب منها الكورة والبورنو كليب ، انا عجبانى فى النادى الأهلى ده حاجة كتتيرة بصراحة منها أنه اعاد للكورة المصرية روحها الفكرة المتاخدة عن الكورة المصرية من زمان يعنى ده غير أنه بقى نموذج لأدارة ناجحة بالعلم والتخطيط الجدي وده صعب نلاقيه فى دول زى مصر اللى الفساد والبيروقارطية نخروه فى جسمها لحد ما بقت دولة رخوه ، أحلى حاجة فى النادى الاهلى قدر يبسط ناس كتتير فى المجتمع ونسى الناس شوية من همهم وعمل والات كتتير من المشجعين .. ربنا يخليه لمصر .

س10 / سمعنا أنت بتحب هروميونى بطلة فيلم هارى بوتر الجزء التانى تحديدا ؟
صحيح انا مش بتحب أتفرج التليفزيون أساساّ والافلام العربية تحديدا والاجنبى الرعب والحاجات ده انا بحب أسمع الافلام الأجنبية المقتبسة من أعمال روائية أنا قرأتها قبل كده لأنها قيمة على فكرة وموقف وقيم وده أهم حاجة عندى ، انا بتفرح على الفيلم من وجه نظر المحلل والمنظر والباحث والملاحظ ، دور هروميونى فى الفيلم أقرب ما يكون منى بالذات انها محبة للقراءة والعلم والمعرفة وذكيه وعندها حدس عقلة وحنكة فى المواقف اللى بتتطلب كده وبالذات انها بنت جميلة فى المقام الأول ...

س 11 / وصلت لأيه لتحليلك طيب ؟
بص أنا ممكن عايز أوفق ودخل علم الاجتماع فى كل حاجة وأربط بين حاجتين مستحيل لاى حد عادى يعملهوم أنا نفسى أكون مبدع فى حياتى بفكر وباكل وبشرب بابداع واجتماع ، لازم أكون صورة مسطرة الناس بيقيسوا عليها أفعالهم وقيمهم ، قدوة من الآخر وده كلمة قالها عنى أحد أعضاء هيئة التدريس من المقربين لى وانا بعتره أبوى بالضبط ، عشان كده اللى انا بحسوا مع لطيفة أو هروميونى صورة من مفهوم" أيواء الذات " وده حالة بتعبر عن مقدر توحدى مع الفنان أو صاحب أى عمل مدبع بالأساس ، كمان انا بتبع الطريقة الاسقاطية فى علم الاجتماع وده طريقة المقصود بيها أنى بسقط مشاعرى وحواسى على هذا الشى أو ذلك وبتأثر بأفعاله ، واحنا كلنا بنعمل الموضوع ده من غير منقصود زى ما نزعل لزعل واحد صحبنا أو نفرح لفرحه ببساطة ، ده غير أن هرميونى فى قاعات الدرس كنت قريب جدا من صورتى فى المحاضرات وزى ما قولت ردود الفعل السريعه والحدس العقلى والنشاط والذكاء ومهاراتها فى الموقف اللى بتحتاج كده .

5 انشر تعليقك على المقالة »